Vun Eichhööncher un Osterplätzjer
vum Achim Meier
Wesst ehr eijentlich, wat e Eichhöönche un ene Fööschter jemein han?
Allebeids sorjen doför, dat em Bösch immer neu Bäum waaße.
Der Fööschter hät doför ene Plan. Hä weiß jenau wo neu Bäum jesatz un wo ahle jeschlage wäde müsse.
Dat Eichhöönche bruch keine Plan. Em Hervs, wann de Nöss un Bocheckere rief sin, fängk et aan, wie jeck alles an Nöss ze sammele un zo versteche, för üvver der Winter ze kumme. Dat Dierche hält jo keine richtije Winterschlof un muss jeläjentlich opstonn un jet frinsele, domet et bei Kräfte bliev.
Die Eichhööncher künne ävver nit esu vill esse wie se verstoche han. Se sin och e bessje verjesslich un finge nit alles widder. Et blieven e janz Deil Nöss, Bocheckere, Eichele un wat weiß ich nit all em Versteck. Un wann die lang jenoch lijje, kiemen se. Un esu waaßen dann neu Bäum.
Wie ich ens enem Eichhöönche zoloore dät, moht ich tireck an ming Mutter sillich denke. Die dät nämlich och, jenau wie die Eichhööncher doför sorje, dat mer immer jenoch Vürrot em Keller hatte. Immer wor alles do un dät op Ensatz waade.
Dat wosste minge Broder un ich natörlich och. Un wann et dann en de Chressdachszick an et Plätzjebacke jingk, komen die en Blechdose en der Keller, för se am Hellije Ovend op bunte Tellere finge ze künne.
Der Vürrot an Kokosmakröncher un Plätzjer dät ävver flöck schrumpe. Immer wa´mer Pänz en der Keller jingke för der Mamm ene Emmer Ädäppel ov e Jlas Enjemahts ze holle, woodt der Deckel vun ener Blechdos opjemaht, en ööntlije Portiun jeraaf un tireck verkimmelt. Koot vör’m Hellije Ovend dät de Mamm ene Bröll, weil nor noch e paar ärmsillije Plätzjer en de Büchse wore. Se wor uns Pänz dann ärch kott. Ich jläuv, unse Papp wor och nit janz unschöldig aan dem Malör.
Unger’m Chressbaum wore ävver trotzdäm jedes Johr Plätzjer jenoch. Hunnichkoche leet de Mamm sich jedes Johr us Nürnberg schecke.
Em nöhkste Johr wor alles anders. De Plätzjer kome nit en Blechdose en de Keller. Uns Mamm hätt se verstoche.
Minge Broder un ich han jesook un jesook un em janze Huus nix jefunge. Die Dose met de Plätzjer wore fott!
Dann jitt et dis Johr op Chressdach evvens mih wie jenoch. Ha´mer uns jedaach!
Ävver wat wor dat för en Üvverraschung. Unger dem Chressbaum lochen nor die Hunnichkoche un e paar Printe us Ooche. Kein einzije Kokosmakron, kei Spretzjebäck, kein usjestoche Weihnachtsplätzjer un vör allem kei „Berliner Brut“.
Verbasert frochten mer de Mamm, wo dann all die Plätzjer wöre, die mer zesamme jebacke hatte? Do peckelten ehr e paar Tröncher de Backen erav. „Ich weiß et nit! Ich han die vör üch Pänz esu jot verstoche, dat ich se selvs nit mih finge kann“.
Do jingk et der Mamm nit anders wie de Eichhööncher, die ehr verstoche Nöss nit mih widderfinge. Et wor unse eeschte Chressdach ohne Plätzjer.
Doför hatte mer an Pooschte de nöhkste Premier: Om Osterdesch stundt nevven der Kump met bunte Eier och en jroße Kump met Chressdachsplätzjer. Drüch un hat, ävver durch dat lange Riefe em Versteck aromatisch un lecker – wa´mer se en Milch zoppe dät.
Der Papp hatt se jefunge, wie hä em Keller dat ahle Räuches met der verklemmte Dür opjemaht hatt. Dä neue offe Kamin em Wonnzemmer dät nit richtich trecke.